6. திரு வேங்கட மாலை 087/104 : வேங்கடமே பூவார்கழலார

[sridharv1946]

6. திரு வேங்கட மாலை 088/104 : வேங்கடமே பூவார்கழலார் பொருப்பு !

நன்காமர் வண்டினமும் , நால் வாய் மத கரியும் ,
மென்காமரமுழக்கும் வேங்கடமே - புன் காமம்
ஏவார்கழலார் எனது உளத்தில் , என் தலை வை
பூவார்கழலார் பொருப்பு

பதவுரை

ஏவார்கழலார் - ஏவார் + கழலார்
பூவார்கழலார் - பூ+ ஆர் + கழலார்

காமர் நல் வண்டு இனமும் அழகிய சிறந்த வண்டுகளின் கூட்டம்
மெல் காமரம் முழக்கும் இனிய இசை பாடும் இடமும்
நால் வாய் மத கரியும் தொங்கும் வாய் உடைய மத யானைகள்
மெல் கா மரம் உழக்கும் அழகிய சோலை மரங்களைப் பெயர்க்கும் இடமுமான
வேங்கடமே திரு வேங்கட மலையே
புன் காமம் ஏவார் தனது அடியார்களை இழிவான காம வழியில் செல்ல விடாதவரும் ,
எனது உளத்தில் கழலார் என் மனத்திலிருந்து நீங்காதவரும்
என் தலை வை பூ ஆர் என் தலையில் வைத்த மலரைப் போன்ற
கழலார் திருவடிகள் உடையவருமான திருமாலின்
பொருப்பு திரு மலை ஆகும்

V.Sridhar