5. திருவரங்கத்து மாலை - 96/114 : திருப் பாற்கடல்

[sridharv1946]

5. திருவரங்கத்து மாலை - 96/114 : திருப் பாற்கடல்

காவும் , சுரபியும் , சிந்தாமணியும் , கடிக் கமலப்-
பூவும் , பணிலமும் , பொங்குஇள மாவும் , புகர்த் தடக் கைம்-
மாவும் , பிறையும் , அமுதமும் , எங்ஙன் - மதில் அரங்கர்
மேவும் தரங்கக் கடல் இல்லை ஆகில் , இவ் விண்ணகர்க்கே ?

பதவுரை :

மதில் அரங்கர் மேவும் ஏழு மதில்கள் சூழ்ந்த திரு அரங்கத்தில் இருக்கும் நம்பெருமான்
தரங்கக் கடல் பள்ளி கொள்ளும் அலைகள் உடைய திருப்பாற்கடல்
இல்லை ஆகில் இல்லை என்றால்
இவ் விண்ணகர்க்கே இந்த தேவ லோகத்திற்கு
காவும் சுரபியும் கற்பகச் சோலையும் , காம தேனுவும் ,
சிந்தாமணியும் சிந்தாமணி எனும் ரத்தினமும் ,
கடிக் கமலப்பூவும் மணம் உடைய தாமரை மலர் பெயருள்ள பதும நிதியும் ,
பணிலமும் சங்க நிதியும் ,
பொங்கு இள மாவும் விளங்கும் இளைய உச்சைஸ்ரவஸ் எனும் குதிரையும் ,
புகர்த் தடக் கைம்மாவும் செம்புள்ளிகள் கொண்ட பெரிய துதிக்கை உள்ள ஐராவதமும் ,
பிறையும் அமுதமும் சந்திரனும் , அமுதமும்
எங்ஙன் எங்கிருந்து கிடைக்கும் ?


V.Sridhar