5. திருவரங்கத்து மாலை - 75/114 : ஸ்ரீ கிருஷ்ண அவதார

[sridharv1946]

5. திருவரங்கத்து மாலை - 75/114 : ஸ்ரீ கிருஷ்ண அவதார வைபவம் 25/25(நிறைவு)

பொரும் கேதனப் படை மன்னரை மாய்த்துப் புவி மடந்தை
பெரும் கேதம் நீக்கி நடந்தது மீளப் பிறங்கு புள்ளின்
வரும் கேசவன் சக்ர மாயோன் அரங்கன் வரவிடுத்த
கரும் கேசம் ஒன்று தன் இச்சையிலே செய்த காரியமே

பதவுரை :

பொரும் பாரதப் போர் செய்த ,
கேதனப் படை கொடிகள் கொண்ட படைகளை உடைய
மன்னரை மாய்த்து அரசர்கள் அனைவரையும் அழித்து ,
புவி மடந்தை பெரும் கேதம் நீக்கி பூமி தேவியின் பெரிய பாரத்தைக் குறைத்து ,
மீள நடந்தது மீண்டும் வைகுண்டத்திற்குத் திரும்பியது :
பிறங்கு புள்ளின் வரும் விளங்குகின்ற கருடன் மேல் எழுந்தருளும்
கேசவன் கேசவன் எனும் திரு நாமம் உடையவனும் ,
சக்ர மாயோன் சக்ராயுதத்தை உடையவனும் , மாயங்கள் செய்பவனுமான
அரங்கன் வரவிடுத்த திரு வரங்கன் ஆகிய திருமால் அனுப்பிய
கரும் கேசம் ஒன்று கரிய கூந்தல் ஒன்று
தன் இச்சையிலே செய்த காரியமே தன விருப்பத்தின் படி செய்த காரியம் ஆகும்

V.Sridhar