3. அழகர் அந்தாதி - 100/100 நிருபா ! உடன் இருந்து உவப

[sridharv1946]

3. அழகர் அந்தாதி - 100/100 நிருபா ! உடன் இருந்து உவப்பது என்றோ ?

ஒருபால் அமரர் , ஒரு பால் முனிவர் , உடன் இருந்து ,
என் இருபார்வையும் கொண்டு உவப்பது என்றோ - இடபக் கிரிக்கும் ,
பொருபாற் கடற்கும் , அயோத்திக்கும் , பொன் - துவரா பதிக்கும்
நிருபா ! வைகுந்தமும் நீ வீற்றிருக்கின்ற நீர்மையுமே

பதவுரை : ஒரு + பால்
இரு + பார்வையும்
பொரு + பால் + கடல்

இடபக் கிரிக்கும் திரு மாலிருஞ்சோலை மலைக்கும் ,
பொரு பாற் கடற்கும் அலைகள் மோதும் திருப்பாற்கடலுக்கும் ,
அயோத்திக்கும் திரு அயோத்திக்கும் ,
பொன் துவரா பதிக்கும் நிருபா அழகிய திருத் துவாரகைக்கும் தலைவா !
வைகுந்தமும் ஸ்ரீ வைகுண்டத்தையும் ,
நீ வீற்றிருக்கின்ற நீர்மையுமே அங்கு நீ இருக்கும் எளிமையான அழகையும்
ஒருபால் அமரர் ஒரு பக்கம் நித்ய சூரிகளுடனும்
ஒரு பால் முனிவர் , உடன் இருந்து ஒரு பக்கம் முக்தர்களுடனும் நான் கூடி இருந்து
என் இருபார்வையும் கொண்டு எனது இரு கண்களாலும் சேவித்துப்
உவப்பது என்றோ பரமானந்தம் அடைவது எப்போது ?
--
V.Sridhar