3. அழகர் அந்தாதி - 040/100 அழகர்க்கு அடிமை என்று உண

[sridharv1946]

3. அழகர் அந்தாதி - 040/100 அழகர்க்கு அடிமை என்று உணர்ந்தால் , யாரும் பிழைப்பார்களே !

நேராயவேதனை நெஞ்சு இடந்தாய் ! நெடுஞ்சோலை மலைக்-
காராயவேதனை முன் படைத்தாய் ! நின் கழற்குத் தொண்டு என்று
ஆராயவேதனைப் புன் பிறப்பு ஓயும் ; அவா-வழியின்
பேராயவேதனை இல் உழைப்போரும் பிழைப்பர்களே






பதவுரை : நேர் + ஆய + ஏதனை
கார் + ஆய ! + வேதனை
ஆராயவே + தனை
பேர் + ஆய + வேதனை

நேர்ஆய ஏதனை எதிரில் நின்ற குற்றமுடைய இரணியனுடைய
நெஞ்சு இடந்தாய் மார்பை நரசிம்மனாய் பிளந்தவனே !
நெடும் சோலை மலை திருமாலிருஞ்சோலை மலையில் உள்ள
கார் ஆய கரிய மேனி கொண்ட ஆயர் குலத்தவனே !
வேதனை முன் படைத்தாய் பிரமனை முன்பு படைத்தவனே !
நின் கழற்கு தொண்டு என்று உனது திருவடிகளுக்கு அடிமை என்று
ஆராயவே ஆராய்ந்து உணர்ந்து கொண்டால் ,
தனைப் புண் பிறப்பு ஓயும் அத்தனை இழிவான பிறப்புகளும் ஓய்ந்து விடும் .
அவா வழியின் ஆசை வழியால்
பேர் ஆய வேதனை பெரிய துன்பங்களின் தொகுதியைத் தரும்
இல் உழைப்போரும் சம்சார பந்தத்தில் இருப்போரும்
பிழைப்பார்களே திருமாலுக்கு அடிமை என்று உணர்ந்தால் , வாழ்வார்கள்