திரு வேங்கடத்து அந்தாதி 86/100 மறுக்கம் அறுக்

[sridharv1946]

திரு வேங்கடத்து அந்தாதி 86/100 மறுக்கம் அறுக்க மறு கமலை அணி மார்பனைச் சேருவீர் !

சேருமறுக்கமுனோயுமரணமுந்தீவினையின்
வேருமறுக்கவிரும்பிநிற்பீர் வடவேங்கடத்தே
வாருமறுக்கவறியாநெவரையும்வாழவருள்
கூருமறுக்கமலையணிமார்பன் கைக்கோதண்டனே




பதவுரை : சேரும் + மறுக்கமும்
வேரும் + அறுக்க
வாரும் + மறுக்க
கூரும் + மறு + கமலை

சேரும் மறுக்கமும் தன் வினையால் வரும் மனக் குழப்பங்களையும்
நோயும் மரணமும் வியாதிகளையும் மரணத்தையும்
தீவினையின் வேரும் கொடிய கருமத்தின் மூலத்தையும்
அறுக்க விரும்பி நிற்பீர் ஒழிப்பதற்கு ஆசை கொண்டு நிற்பவர்களே !
வட வேங்கடத்தே வாரும் திரு வேங்கட மலைக்கு வாருங்கள்
மறு கமலை ஸ்ரீவத்ஸம் எனும் மறுவையும் திரு மகளையும்
அணி மார்பன் மார்பில் உடையவனும் ,
கை கோதண்டன் கோதண்டம் எனும் வில்லைக் கையில் உடையவனும்
எவரையும் மறுக்க அறியான் எவரையும் விலக்க அறியாதவனையுமான திருமால்
எவரையும் வாழ அருள் கூரும் அனைவரையும் வாழ கருணை புரிவான் !