திரு வேங்கடத்து அந்தாதி 64/100 உலகம் உண்டாவதற&

[sridharv1946]

திரு வேங்கடத்து அந்தாதி 64/100 உலகம் உண்டாவதற்கு உன் உந்தித்தாமரையே காரணம் !

உலகந்தரவுந்திபூத்திலையேற் சுடரோரிரண்டு-
மிலகந்தரமும்புவியுமெங்கே யயனீசனெங்கே
பலகந்தர முமுணவுமெங்கேபல்லுயிர்களெங்கே
திலகந்தரணிக்கெனனின்றவேங்கடச்சீதரனே



பதவுரை :உலகம் + தர
இலகு + அந்தரமும்
பல + காந்தரமும்
திலகம் +தரணி

தரணிக்குத் திலகம் என நின்ற பூமிக்குத் திலகம் போல் அழகு செய்யும்
வேங்கடச் சீதரனே திரு வேங்கட மலையில் இருக்கும் திருமாலே !
உலகம் தர உலகங்களைப் படைப்பதற்காக
உந்தி பூத்திலையேல் உன் நாபியில் தாமரை மலர வில்லையென்றால்
சுடர் ஓர் இரண்டும் சூரிய சந்திரர்களாகிய இரு சுடர்களும்
இலகு அந்தரமும் அவை விளங்கும் இடமான ஆகாயமும்
புவியும் எங்கே பூமியும் எவ்விடத்தில் தோன்றும் ?
அயன் ஈசன் எங்கே பிரமனும் சிவனும் எவ்விடத்தில் தோன்றுவர் ?
பல கந்தரமும் உணவும் எங்கே பல மேகங்களும் உணவுகளும் எவ்விடத்தில் தோன்றும் ?
பல உயிர்கள் எங்கே பலவகை உயிர்களும் எவ்விடத்தில் தோன்றும் ?