திருவேங்கடத்து அந்தாதி 2/100 எல்லோரும் ஏத்த&am

[sridharv1946]

திருவேங்கடத்து அந்தாதி 2/100 எல்லோரும் ஏத்தும் மலை எது ?

மாலைமதிக்குஞ்சியீசனும்போதனும்வாசவனும்
நூலைமதிக்கும்முனிவரும்தேவரும்நோக்கியந்தி
காலைமதிக்குள்வைத்தேத்தும்திருமலைகைம்மலையால்
வேலைமதிக்கும்பெருமானுறைதிருவேங்கடமே



பதவுரை : மாலை + மதி + குஞ்சி
நூலை + மதிக்கும் (ஆராயும்)
காலை + மதிக்குள் (அறிவில்)
வேலை + மதிக்கும் (கடையும்)

மாலை மதிக் குஞ்சி ஈசனும் அந்தி நிலவைத் தரித்த முடி உடைய சிவனும் ,
போதனும் வாசவனும் பிரமனும் , இந்திரனும் ,
நூலை மதிக்கும் முனிவரும் சாத்திரங்களை ஆராயும் முனிவர்களும் ,
அந்தி காலை மாலையிலும் காலையிலும்
மதிக்குள் வைத்து ஏத்தும் அறிவில் வைத்து துதிக்கும்
திருமலை சிறந்த மலை
கைம் மலையால் மலை போன்ற கைகளால்
வேலை மதிக்கும் பெருமான் பாற்கடலைக் கடைந்த திருமால்
உறை திருவேங்கடமே இருக்கும் திரு வேங்கட மலையே !