திருவரங்கத்தந்தாதி 99/100 சிந்து சூழ் உலகம் ப&

[sridharv1946]

திருவரங்கத்தந்தாதி 99/100 சிந்து சூழ் உலகம் படைத்தவனே ! சிந்தா ! என் சிந்தாகுலம் தீர் !

சிந்தாகுலமுய்யக்குன்றெடுத்தாய்தென்னரங்கசுற்றுஞ்-
சிந்தாகுலகுலகம்படைத்தளித்தாய்னிலஞ்சென்றிரந்த
சிந்தாகுலவுசெல்வந்தந்தைதாய்குருதெய்வமுநீ
சிந்தாகுலமடைந்தேனடியேன்சென்மந்தீர்த்தருளே

பதவுரை : சிந்து + ஆ + குலம்
சிந்து + ஆகு + உலகம்
சிந்தா + குலவு
சிந்தா + ஆகுலம்

சிந்து இந்திரன் பொழிந்த மழையால் வருந்திய
ஆ குலம் பசுக் கூட்டம்
உய்ய வாழ்வதற்கு
குன்று எடுத்தாய் கோவர்த்தன மலையை குடையாய் எடுத்தவனே !
தென் அரங்க ஸ்ரீ ரங்கத்தில் இருப்பவனே !
சுற்றும் சிந்து ஆகு சுற்றிலும் கடல் சூழ்ந்த
உலகம் படைத்து அளித்தாய் உலகத்தை உண்டாக்கி கொடுத்தவனே !
சென்று நிலம் இரந்த மகாபலியிடம் சென்று நிலத்தை யாசித்த
சிந்தா வாமனனே !
குலவு செல்வம் சிறப்பான செல்வமும்
தந்தை தாய் தந்தையும் தாயும்
குரு தெய்வம் ஆசிரியனும் கடவுளும் எல்லாம் நீயே !
சிந்தா ஆகுலம் அடைந்தேன் மனக் கலக்கம் அடைந்துள்ள
அடியேன் சென்மம் அடியேனுடைய பிறப்புகளை
தீர்த்து அருள் ஒழித்துக் கருணை செய்.