திருவரங்கத்தந்தாதி 23 இலங்கையில் ஆதரன் ஓட

[sridharv1946]

திருவரங்கத்தந்தாதி 23 இலங்கையில் ஆதரன் ஓட, வாணன் இலங்கையன் ஆக, ஆதவன் போகக்கண்டான் இதய ரங்கன் !


இலங்கையிலாதரனைங்கரன்மோடியெரிசுரத்தோன்
இலங்கையிலாதமலையானவீசநிரியவெம்போர்-
இலங்கையிலாதபடிவாணனைச்செற்றவென்னரங்கன்
இலங்கையிலாதவன்போகக்கண்டானென்னிதயத்தனே !


பதவுரை :


இலங்கு அயில் ஆதரன் விளங்கும் வேலை விரும்பும் வேலனும் ,
ஐங்கரன் ஐந்து கைகளை உடைய கணபதியும் ,
மோடி துர்க்கையும் ,
எரி அக்கினியும் ,
சுரத்தோன் ஜுரதேவதையும் ,
இலம் கயிலாதமலை கைலாயமலையை இல்லமாக உடைய சிவனும் ,
இரிய அஞ்சி ஓட
வெம் போரில் கடுமையான சண்டையில்
அம் கை இலாதபடி அழகிய ஆயிரம் கைகள் இல்லாதபடி
வாணனை செற்ற பாணாசுரனை அழித்திட்ட கண்ணனும் ,
இலங்கையில் இலங்காபுரியில்
ஆதவன் போகக் கண்டான் சூரியனை உள்ளே போகச் செய்த ராமனும் ஆன
என் அரங்கன் எனது ரங்கநாதன்
என் இதயத்தன் என் இதயத்தில் உள்ளான்